A AMUPo pide cautela na rehabilitación do conxunto fortificado de Salvaterra de Miño

A Asociación de Amigas e Amigos do Museo de Pontevedra (AMUPo) vén de solicitar personarse en tódolos expedientes da Dirección Xeral do Patrimonio Cultural da Xunta de Galicia que afecten ao conxunto fortificado de Salvaterra de Miño.

O Consello Reitor da entidade tomou esta decisión logo de coñecer o expediente de contratación tramitado polo Concello de Salvaterra de Miño para a instalación do Museo da Enoloxía do Condado do Tea nas denominadas Covas de Dona Urraca.

 

Dende a Sección de Patrimonio e Bens Culturais da AMUPo sinálase a inadecuación das obras e do proxecto expositivo ao histórico conxunto, tendo en conta as anteriores intervencións municipais na fortificación, como o Museo do Viño Condado do Tea no Pazo do Conde, que non tivo continuidade temporal e non está aberto ao público.

No mesmo sentido, a entidade quere sinalar que o Castelo de Salvaterra de Miño, con todos os edificios que o conforman son un Ben de Interese Cultural, en virtude do artigo 88.1.a) da Lei 5/2016, do 4 de maio, do patrimonio cultural de Galicia, polo que concorre no Concello de Salvaterra de Miño un deber de conservación coa maior protección, así como un dereito de visitas públicas que se incumpre reiteradamente.


Imaxe destacada: Arquivo gráfico do Museo de Pontevedra.

O Concello de Castro Caldelas asume unha recomendación da Valedora do Pobo, por intervención da AMUPo

O Concello de Castro Caldelas (Ourense) vén de aceptar unha recomendación feita pola Valedora do Pobo, dona Milagros Otero, sobre a conservación do Castelo de Castro Caldelas; inmoble que fora declarado BIC, por Resolución da Dirección Xeral de Patrimonio Cultural da Xunta de Galicia, o 14 de maio de 1997, após a súa cesión para uso público pola Casa de Alba.

Castelo de Castro Caldelas (Ourense) © HombreDHojalata
Vista do Castelo de Castro Caldelas (Ourense). © HombreDHojalata

Esta recomendación pon fin a un expediente de denuncia efectuada polo secretario da Asociación de Amigas e Amigos do Museo de Pontevedra -AMUPo-, Ernesto Vázquez-Rey, quen solicitou a intervención da institución do Valedor do Pobo dado o mal estado de conservación dalgunhas zonas do Castelo, así como para chamar á atención sobre os materiais empregados nas súas distintas fases de restauración; non gardando, nos máis dos casos, nin a máis mínima sensibilidade estética para co conxunto patrimonial.

Continue reading “O Concello de Castro Caldelas asume unha recomendación da Valedora do Pobo, por intervención da AMUPo”