No final da mañá de onte, 16 de outubro, o Edificio Xudicial da Parda acolleu un acto público de transferencia da Declaración xudicial de herdeiras ab intestato do polifacético Alfonso Daniel Rodríguez Castelao, falecido o 7 de xaneiro de 1950.
O expediente xudicial, incoado o 25 de febreiro de 1972, rematou coa declaración de herdeiras de Castelao a favor das súas irmás, Josefina e Joaquina Teresa Rodríguez Castelao, ao ter finado xa nese momento a viúva do político e artista, Virxinia Pereira Renda -en 1969-, e tamén con anterioridade o único fillo de ambos, Alfonso Xesús -en 1928-.
O achado do expediente no arquivo xudicial constata o feito sucesorio das irmás de Castelao, xa coñecido, e contextualiza a sucesión que posteriormente se realizaría a favor da familia Baltar; principais herdeiros do patrimonio e dereitos sobre a obra de Castelao.
A transferencia, realizada ao Arquivo Histórico Provincial de Pontevedra, ao ser legalmente a única institución receptora posible, sumará á súa colección o expediente orixinal. De forma complementaria, o Arquivo documental do Museo de Pontevedra recibirá unha copia testemuñada do expediente, para completar así a documentación persoal de Castelao que se custodia xunto á maior parte da obra artística do autor rianxeiro.
Ao acto de transferencia asistíu o presidente das Amigas e Amigos do Museo de Pontevedra, Ernesto Vázquez-Rey, que ofreceu a súa valoración tanto do achado como sobre o contido e destino do expediente, agradecendo especialmente o labor de Pablo López, funcionario do corpo de auxilio xudicial do Xulgado de 1ª Instancia 1 de Pontevedra, responsable do achado.
Amigas e Amigos do Museo de Pontevedra 